ភ្នំពេញៈ ទុនវិនិយោគក្នុងវិស័យសំណង់នៅកម្ពុជា ដែលជាក្បាលម៉ាស៊ីនជំរុញកំណើនសេដ្ឋកិច្ចក្នុងរយៈពេលជិត ២០ ឆ្នាំមកនេះ មានតម្លៃសរុបជាង ៤៤ ពាន់លានដុល្លារ។ នេះបើយោងតាមរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។
ថ្លែងក្នុងកិច្ចប្រជុំស្តីពីការសិក្សាគម្រោងប្លង់ និងសាងសង់អគារ កាលពីថ្ងៃម្សិលមិញ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា ចាប់តាំងពីដើមឆ្នាំ ២០០០ ដល់ខែ ឧសភា ឆ្នាំ ២០១៩ ក្រសួងបានអនុម័តគម្រោងសាងសង់ចំនួន ៤៥ ២៦៤ គម្រោង ដែលមានតម្លៃសរុប ៤៤,៥៧ ពាន់លានដុល្លារ។
កិច្ចប្រជុំកាលពីថ្ងៃម្សិលមិញនេះត្រូវបានធ្វើឡើងដើម្បីបង្កើនការគ្រប់គ្រងលើការសាងសង់បន្ទាប់ពីការដួលរលំអគារ ៧ ជាន់ ដែលគ្រប់គ្រងដោយជនជាតិចិននៅខេត្តព្រះសីហនុកាលពីខែមុនដែលបានសម្លាប់មនុស្ស ២៨ នាក់ និងរបួស ២៦ នាក់។
លោក ជា សុផារ៉ា បានថ្លែងថា៖ «បច្ចុប្បន្នក្រសួងកំពុងបញ្ជូនមន្ត្រីជំនាញជាច្រើនឲ្យចុះទៅសិក្សាគុណភាពសំណង់ទាក់ទងនឹងគុណភាពនៃសំណង់ដែលបានសាងសង់រួច និងកំពុងសាងសង់យ៉ាងច្រើននៅកម្ពុជាក្នុងពេលនេះ»។
No comments:
Post a Comment